حه‌رفا بێ

187- ئبلیس: مه‌خسه‌د‌ ‌ژ ڤێ که‌لیمێ د قورئانێ ده، که‌سه‌که: ساخ و فێهما و خوه‌ی ته‌کلیف و حیله‌کار کو نایێ دیتن. ‌ئه‌وی نه‌گوهداری یا خودا‌ کر و ژ ئاده‌م را سه‌جده نه‌بر و بوو موسته‌حه‌قێ له‌عن و عه‌زابێ.

ئختلاف هه‌یه کانێ گه‌لوو: ئبلیس ناڤێ وی یه‌؟ ئان ناڤێ وی عه‌زازیله‌ و ئبلیس ژ «ئبلاس»ێ (بێ هێڤی و مه‌ئیووسێ ژ ره‌حما خودێ) هاتیه گرتن و صفه‌تێ وی ‌یه؟ هنه‌کا گووتیه ئبلیس نه‌ که‌لیمه‌یه‌ک عه‌ره‌بی یه و ژ «ئبلاس»ێ نه‌ھاتیه گرتن. و هه‌ما ناڤێ وی یه.

هه‌روها ئختلافه کو گه‌لوو: ژ مه‌لائیکه‌تا بوویه ئان نه؟ ئه‌وێن دبێژن ژ مه‌لائیکه‌تا بوویه، ده‌لیلا خوه‌ ژ به‌قه‌ره/ 34 تینن کو خودێ ئه‌مرێ مه‌لائیکه تا کر بچن سه‌جده و د په‌ی را ڤێجا د‌بێژێ: ئبلیس ته‌نێ سه‌جد‌ه‌ نه‌بر، ئه‌و ئه‌شكه‌ره‌یێ ئستسنائێ ژ خوه‌ره‌ د‌ه‌لیل زانن و ھنه‌ك روایه‌تا ژی تینن.

ئه‌ڤێنھه‌ ئایه‌تا 50 یا سووره‌تێ كه‌ھف: ئبلیس ژ جننا بی. وھا ته‌فسیر د‌كن كو: حه‌قیقه‌تا جن و مه‌لائیكه‌تا یێك تشته‌، لێ ڤێجا یێن بژارتی بوونه‌ مه‌له‌ك و یێن بنره‌تر بوونه‌ جن، وه‌ك مرووڤان كو بژاره‌یێن وان بوونه‌ پێغه‌مبه‌ر و یێن د‌ی د‌ د‌ه‌ره‌جێن بنره‌تر د‌ا نه‌. بنێرن: مه‌جمه‌عول به‌یان و ئه‌لمنارێ. به‌قه‌ره‌/ 34

د‌ قورئانێ د‌ه‌ زێد‌ه‌تر پێ ناڤێ شه‌یطان ژ ئبلیس ھاتیه‌ خه‌به‌رد‌ان. كه‌لیما ئبلیس 11 جاران ھاتیه‌ و خێنجی ژ شوعه‌را/95 و سه‌به‌ء/ 20 د‌ جھێن د‌ی د‌ا به‌حسا سه‌جد‌ه‌ نه‌برنا ئبلیسه‌ ژ ئاد‌ه‌م را. به‌قه‌ره‌/ 34، ئه‌عراف/ 11، حجر/ 31- 32، ئسراء/ 61، كه‌ھف/ 50، طاھا/ 116، شوعه‌را/95، سه‌به‌ء/ 20، صاد‌/ 74- 75

ژ ناس كرنا پتر یا ئبلیس را بنێرن كه‌لیما « ش ط ن - شه‌یطان».

188- بلع - به‌له‌ع: د‌اخارن، د‌ابه‌لین، د‌اقورتاند‌ن، ژێرد‌ه‌ برن. د‌ قصه‌تا تووفانا حه‌زره‌تێ نووح د‌ه‌: ‌«وَقِيلَ يَا أَرْضُ ابْلَعِي مَاءكِ - و ھات گووتن: عه‌رد‌ێ! ئاڤا خوه‌ ژێرد‌ه‌ ببه‌ - ھوود‌ 44». یێك جارێ ھاتیه‌.

189- بلغ، بولووغ، به‌لاغ: گھانا ئاخریكا مه‌خسه‌د‌ێ. ڤێجا چ جی بێ و چ زه‌مان بێ وچ ژی تشته‌ك مه‌علووم كری بێ. جارنا مه‌خسه‌د‌ نێزیكبوونا مه‌خسه‌د‌ێ یه‌ ھه‌رچه‌ند‌ نه‌گھێ د‌ووماھیكا وێ.

« وَإِذَا طَلَّقْتُمُ النَّسَاء فَبَلَغْنَ - د‌ه‌ما ھه‌وه‌ ژن به‌رد‌ان و ئه‌و نێزیكێ خلاسه‌كا وه‌ختێ خوه‌ بوون - به‌قه‌ره‌/ 231». گووتنه‌ ل ڤێد‌ه‌رێ ب مه‌عنا نێزیكبوونا خلاسه‌كا وه‌ختێ یه‌ چكو ئه‌گه‌ر عد‌د‌ه‌ خلاس بی ئێد‌ی روجووع چێنابێ و ئه‌گه‌ر بخازێ لازمه‌ جاره‌ك د‌ی مه‌ھر بكێ.

« إِنَّ اللَّهَ بَالِغُ أَمْرِهِ - براستی خود‌ێ د‌گھێ كارێ خوه‌ - طه‌لاق/ 3». ل ڤێد‌ه‌رێ بالغ لازمی یه‌ نه‌ موته‌عه‌د‌د‌ی.