ئه‌خلاقێ پێغه‌مبه‌ر صلی الله‌ علیه‌ و آله‌

ھه‌ر وھا د‌ مالێ د‌ا و گه‌ل ئه‌ھل و عیالێ خوه‌ ژی پر ب ره‌حم و د‌لووڤان بی. ئه‌نه‌سێ مالك خزمه‌تكارێ ره‌سوولێ خود‌ێ صلی الله‌ علیه‌ و آله‌ د‌بێژێ: من كه‌س ژ عیالێ خوه‌ را ژ ره‌سوولێ خود‌ێ صلی الله‌ علیه‌ و آله‌ ب ره‌حمتر نه‌د‌یتیه‌.

ره‌سوولێ خود‌ێ نه‌ ھه‌ما ژ مالیێن خوه‌ را به‌لكی ژ ھه‌ركه‌سی را بره‌حم و د‌لووڤان بی.

7- د‌لنزمی و نه‌فس سڤكی

ژ ئه‌خلاقێن وی صلی الله‌ علیه‌ و آله‌ یێن بژاره‌ نه‌فس سڤكی و ته‌وازوعا وی بی. ئه‌ھلێ تاریخێ گه‌له‌ك نموونێن رند‌ و خوه‌ش گێرانه‌، ھنه‌ك ژ وان ئه‌ڤن:

1- عه‌د‌ی یێ كورێ حاته‌م د‌بێژێ: د‌ مزگه‌فتێ د‌ا ئه‌ز چووم بال موحه‌ممه‌د‌ صلی الله‌ علیه‌ و آله‌ ، من سه‌لام د‌ایێ، ئه‌وی پرسی كو تو كی یی؟ من گووت: ئه‌ز عه‌د‌ی یێ كورێ حاته‌مم. رابی و ئه‌ز برم مالا خوه‌، رێڤه‌ پیره‌ژنه‌كی زه‌عیف و لاواز راستێ ھات و ئه‌و سه‌كناند‌، د‌ه‌مه‌ك د‌رێژ سه‌كنی و ئه‌وێ ژی د‌ه‌رد‌ێ خوه‌ ژێرا د‌گووتا. من ژ خوه‌ را گووت: وللاھی ئه‌ڤ نه‌ پاشا یه‌. پاشێ ھات و ئه‌ز برم مالا خوه‌ و رایێخه‌ك ئانی و گووت من روونێ سه‌ر، من ژی گووتێ نه‌خێر تو روونێ سه‌ر و ئه‌وی د‌یسا گووت من: نه‌، تو روونێ، ئه‌ز روونشتم سه‌ر و ئه‌و ژی لسه‌ر عه‌رد‌ێ روونشت. ڤێجا من د‌ د‌لێ خوه‌ د‌ا گووت: خود‌ێ ئه‌ڤ نه‌ پاشا یه‌.[27] ئه‌ڤ خوه‌ مه‌زن نه‌كرنا سه‌ر خه‌لكێ ھه‌ما ته‌بیعه‌ت بی ژ وی را ص.

2- ئه‌و حه‌زره‌ت چو سه‌حا سه‌عد‌ێ كورێ عوباد‌ه‌، د‌ه‌ما ژ بالێ رابی، سه‌عد‌ كه‌ره‌ك ژ صواریا وی را ئانی و گووت كورێ خوه‌ سه‌عد، ‌گه‌ل ھه‌ره‌، د‌ه‌ما رێكه‌تن، پێغه‌مبه‌ر صلی الله‌ علیه‌ و آله‌ گووتێ گه‌ل من صوار ببه‌، ئه‌وی قه‌بوول نه‌كر، پێغه‌مبه‌ر صلی الله‌ علیه‌ و آله‌ گووتێ: ئان تێ صوار ببی ئان ژی گه‌ره‌كه‌ تو بزڤری.[28] ئه‌وی حه‌زره‌تی حه‌ز نه‌د‌كرا كو ئه‌و صوار بێ و سه‌عد‌ په‌یاری بكه‌ڤێ په‌ی، چكو ئه‌ڤ كار نیشانێ خوه‌ مه‌زن كرنێ بی و ئه‌وی صلی الله‌ علیه‌ و آله‌ ژێ حه‌ز نه‌د‌كرا.

3- ھه‌ر وھا جاره‌كی ره‌سوولێ خود‌ێ صلی الله‌ علیه‌ و آله‌ صوارێ ل سه‌ر كه‌ره‌كی كو جلكری بی ب حه‌سیرێ چو ناڤ به‌نی نه‌زیر و قوره‌یزه‌ و خه‌یبه‌رێ. سه‌راترێ ژ ئه‌ڤقا نه‌فس سڤكیێ ئید‌ی نه‌فس سڤكی نینن. ته‌وازوع و د‌لنزمی ژ ئه‌خلاقێن كفشه‌ یێن ره‌سوولێ خود‌ا بی صلی الله‌ علیه‌ و آله‌ و پێ ڤی ئه‌خلاقێ ھێژایی بی كو د‌ل ڤه‌گرتن.

8- زاھد‌یا د‌ د‌ونیایێ د‌ا

زاھد‌یا د‌ ھه‌می تشتێن د‌ونیایێ صفه‌ته‌ك د‌ی یێ ره‌سوولێ خود‌ا بی صلی الله‌ علیه‌ و آله‌ ، ئه‌وی فه‌قیری سه‌ر د‌ه‌وله‌مه‌ند‌یێ را و ته‌نگی سه‌ر فره‌ھیێ را گرت. ئه‌ڤه‌ ژی ھنه‌ك روایه‌تێن د‌ه‌رحه‌ق زاھد‌ی یا وی د‌ا صلی الله‌ علیه‌ و آله‌ :

1- ھه‌ڤژینا وی عایشه‌ د‌بێژێ: پێغه‌مبه‌ر ص زكێ خوه‌ ژ برسیتی یێ تێر نه‌كر و قه‌ت شكایه‌تا حالێ خوه‌ نه‌بر بال كه‌سی. فه‌قیری ژێرا ژ د‌ه‌وله‌مه‌ند‌ی یێ خوه‌شتر بی، جار ھه‌بی شه‌ڤه‌كی برچی د‌ما لێ د‌یسا ژی نه‌د‌بو سه‌به‌ب كو رۆژیا صبه‌ھێ وێ شه‌ڤێ نه‌گرێ، ئه‌گه‌ر ژ خود‌ایێ خوه‌ بخوه‌ستا وێ د‌ه‌ریێن خه‌زنێن عه‌رد‌ێ و فێكیێ وێ لبه‌ر ڤه‌كرا و ژیانا وی خوه‌ش بكرا. ژ به‌ر وێ برستی یا وی د‌لێ من شكه‌ست و من د‌ه‌ستێ خوه‌ سه‌ر زكێ ویڤه‌ ئانی و گووتێ: ئه‌ز گوھری، چره‌ تو ژ د‌ونیایێ قاسێ خارنا خوه‌ ناخازی؟