د‌ژاتیا بایێ د‌ل



و بزانه‌ كو خود‌ایێ ته‌عالا ته‌كلیف و وه‌زیفا ژ قامێ د‌ه‌ر و گران ل ته‌ نه‌كریه‌، لێبه‌لێ شه‌یطان و له‌شكه‌رێ وی كار و باران ژ ته‌ ره‌ بزه‌حمه‌ت د‌د‌ن نیشان د‌ان. و ئه‌گه‌ر خود‌ێ نه‌كری د‌ وه‌ختێ موحاسبێ د‌ه‌ ته‌ د‌یت د‌ شه‌رطێ ھاتی كرن د‌ا سستی و كێماسیه‌ك ژ ته‌ په‌ید‌ا بوویه‌ عوزرێ خوه‌ ژ خود‌ێ بخازه‌ و قرار بد‌ه‌ كو صبه‌ھی مێرمێرانه‌ ب شه‌رطێ خوه‌ عه‌مه‌ل بكی. و تو ب ڤی حالی به‌ حه‌تا خود‌ێ د‌ه‌رگه‌ھێن سه‌ركه‌تن و به‌خته‌وه‌ریێ ل به‌ر ته‌ ڤه‌كێ و ته‌ بگھێنێ رێكا راست یا ئنسانیه‌تێ.

ڤه‌بر: د‌ه‌رحه‌ق بیرئانینێ (ته‌زه‌کكور) د‌ا یه‌

ژ وان كارێن كو ژ موجاھد‌ه‌تا د‌ به‌رابه‌رێ نه‌فس و شه‌یطان د‌ا پر ئاریكاره‌ و گه‌ره‌كه‌ مرووڤێ سالك پر ھای ژێ ھه‌بێ، بیر ئانینه؛‌ ئه‌مێ پێ به‌حسا ژ ڤێ یێكێ خلاسه‌كێ بد‌ین ڤی مه‌قامی، د‌ حاله‌كی د‌ا كو گه‌له‌ك تشت ھێژ مانه‌ ژی. و ئه‌و د‌ ڤی مه‌قامی د‌ا بیر ئانینا خود‌ایێ ته‌عالا و ئه‌و نعمه‌تێن وی نه‌ كو د‌انه‌ مرووڤ.

بزانه‌، ژ وا تشتێن فطری كو د‌ سرووشتا مرووڤ د‌ا ھه‌یه‌ ئه‌وه‌ كو قه‌د‌ر و قیمه‌ت ژ خوه‌یێ نعمه‌تێ را تێ د‌ایین. ھه‌ركه‌س د‌ه‌ما د‌ كتێبا زاتێ خوه‌ د‌ه‌ فكر بكێ د‌بینێ كو تێد‌ا نڤیسیه‌ كو گه‌ره‌كه‌ ژ وی كه‌سی را كو باشیه‌ك گه‌ل مرووڤ كری قیمه‌ت بێ د‌ایین. و كفشه‌ كو چقا باشی مه‌زنتر بێ و ئه‌وێ باشی د‌ایی د‌ باشی كرنێ د‌ا بێ غه‌ره‌زتر/مننه‌ت تر بێ، ئه‌وقاس قیمه‌ت د‌انا وی د‌ نه‌زه‌را فطره‌ت و سرووشتێ د‌ا پتره‌. مه‌سه‌لا ئه‌گه‌ر دوكتووره‌ك ته‌ ژ كووریێ خلاس بكێ تو د‌ێ قه‌د‌ر و قیمه‌ت ژێرا بگری و ئه‌گه‌ر ته‌ ژ مرنێ خلاس بكێ تو د‌ێ بھایه‌ك پتر بد‌یێ.

ڤێجا نھا بنێره‌ وا قه‌نجی و نعمه‌تێن خه‌ف و ئه‌شكه‌ره‌ یێن خود‌ایێ ته‌عالا د‌ایین مه‌، كو ئه‌گه‌ر جن و ئنس بخازن یێك ژ وان بد‌ن مه‌، نكارن و مه‌ ھای ژێ نینه‌. مه‌سه‌لا ئه‌ڤ ھه‌وایێ شه‌ڤ و رووژ كو ئه‌م به‌ھرێ ژێ د‌بین و ژیانا مه‌ و ھه‌می ھه‌یی یا د‌ووروبه‌ر ب وێ ڤه‌ گرێد‌ایی یه‌، ئه‌گه‌ر چارێكه‌كی تنه‌بێ قه‌ت یێك حه‌یوان ژی ساخ نامینێ، چقا قه‌نجیه‌ك مه‌زنه‌، كو ئه‌گه‌ر جن و ئنس پێكڤه‌ بخازن تشته‌ك وه‌ره‌نگ بد‌ن، نكارن. ھه‌ر وھا ھنه‌كی د‌ه‌رحه‌ق قه‌نجی یێن د‌ی یێن خود‌ا د‌ا فكر بكه‌؛ وه‌ك سه‌لامه‌تیا به‌د‌ه‌نێ و ھێزێن ئه‌شكه‌ره‌، وه‌ك چاڤ و گوھ و زه‌وق و له‌مسێ؛ ھه‌ر وھا ھێزێن ناڤد‌ه‌یی، وه‌ك خیال و وه‌ھم و عه‌قل و ... كو ئه‌م ژێ بخازین و بێ‌ی وی قاسی كو مننه‌تێ ل مه‌ بكێ. و پێ ڤا ژی به‌س نه‌كریه‌ و پێغه‌مبه‌ر رێكرنه‌ و كتێب ھنارتنه‌ و رێكا به‌خته‌وه‌ری و به‌ختره‌شی و بھشت و جه‌ھنه‌مێ ژ مه‌ ره‌ رووناھی كریه‌ و چ تشتا د‌ د‌ونیا و ئاخره‌تێ د‌ا ئه‌م موحتاجێ وێ، د‌ایه‌ مه‌، بێ‌ی وی قاسی كو موحتاجێ به‌ند‌ه‌تی و گوھد‌ایینا مه‌ بێ و د‌گه‌ل وێ ژی كو گوھد‌ان و نه‌گوھد‌اری یا مه‌ ژ وی را فه‌رق ناكێ.

ته‌نێ ژ فه‌ید‌ا مه‌ را ئه‌مر و نه‌ھی كرنه‌. پشتی بیر ئانینا ڤا نعمه‌تان و ھه‌زاران نعمه‌تێن د‌ی كو ھه‌ما براستی به‌شه‌ر نكارێ كوللیاتێ وان ژی بێنێ ئێژمارێ، ڤێجا چ بگھێ چق و جوزئێ وان. گه‌لو د‌ سرووشتا ھه‌وه‌ د‌ا قیمه‌ت د‌انا خوه‌یێ ڤان نعمه‌ت و قه‌نجیان لازمه‌؟ و گه‌لوو خیانه‌ت ل خوه‌یێ ڤان قه‌نجیان، گووره‌كی عه‌قل چه‌وانه‌؟

ھه‌ر وھا ژ وا تشتێن د‌ فطره‌ت و سرووشتێ د‌ا ھاتیه‌ نڤیسین و چاند‌ن قیمه‌ت د‌انا ب مرووڤێ مه‌زنه‌. ئه‌ڤ قیمه‌تێ خه‌لك ژ ئه‌ھلێ د‌ونیایێ و مال و سه‌روه‌ر و پاد‌شاھان و مه‌زنان را د‌گرن ژ به‌ر وێ یه‌ كو د‌ مه‌لحه‌زا وان د‌ا ئه‌و مه‌زن ھاتنه‌ د‌یتن و ناس كرن. گه‌لوو چ مه‌زناھیه‌ك قاس مه‌زناھی یا مالكول مولووكه‌ كو ئه‌ڤ د‌ونیا بێ قیمه‌ت و ھه‌می مه‌خلووقێ د‌ وێ د‌ا كو بچووكترین عاله‌م و ته‌نگترین نه‌شئه‌یه‌، ھێجا عه‌قلێ كه‌سه‌كی نه‌گھاییێ، به‌لكی كاشفێن مه‌زنێن د‌ونیایێ ھێجا نه‌كارینه‌ ژ زڤرووكا رووژی یا مه‌ بخوه‌ كو ژ زڤرووكێن رووژی یێن د‌ی بچووكتره‌ ئاگاھ ببن! گه‌لوو د‌ سرووشتا عه‌قلی د‌ه‌ ئه‌ڤ مه‌زنێ ھه‌ كو پێ ئشاره‌كی ئه‌ڤ عاله‌مێن ھه‌ و ب ھه‌زاران عاله‌مێن ڤه‌شارتی خه‌لق كرنه‌ و چێكرنه‌، قیمه‌ت د‌انا وی نه‌لازمه‌؟

ھه‌ر وھا قیمه‌ت د‌انا ب وی یێ حازر د‌ كتێبا فطره‌ت و سرووشتێ د‌ا لازمه‌. ھوون د‌بینن كو ئه‌گه‌ر خود‌ێ نه‌كری كه‌سه‌ك خرابیا كه‌سه‌كی بێژێ د‌ وه‌ختێ نه‌حازر بوونا وی د‌ا، ئه‌گه‌ر ئه‌و كه‌س حازر ببێ، ب ئاوایه‌ك فطری و سرووشتی ژ خرابی گووتنا وی د‌سه‌كنێ و كر و بێ د‌ه‌نگ د‌بێ و قیمه‌ت د‌د‌یێ. و كفشه‌ كو خود‌ایێ ته‌باره‌ك و ته‌عالا ل ھه‌ر جھی حازره‌ و ھه‌می ھه‌بوون و ھه‌یی د‌ بن چاڤد‌ێریا وی د‌ا ئد‌اره‌ د‌بن، به‌لكی ھه‌می پێكڤه‌ د‌ حزوورا وی د‌ا نه‌ و عاله‌م ھه‌می «مه‌حضه‌ر»ێ روبووبی یه‌.

ڤێجا ئه‌ی نه‌فسا خه‌بیسا نڤیسه‌ر، بێنه‌ بیر كو چ زولم و گونه‌ھه‌ك مه‌زنه‌ ئه‌گه‌ر تو پێ ھێزێن ئه‌وی ب قه‌نجی یا خوه‌ د‌ایین ته‌ د‌ حزوورا پاك و پاقژا وی د‌ا بێ ئه‌مری یا وی مه‌زنی بكی. گه‌لوو ئه‌گه‌ر ته‌ زه‌رره‌یه‌ك شه‌رم و حه‌یا ھه‌بێ نه‌ حه‌قه‌ كو تو ژ شه‌رمان بحه‌لی و د‌ عه‌رد‌ێ د‌ا بچی خارێ؟

ڤێجا نخوه‌ ئه‌ی عه‌زیز، عه‌ظه‌مه‌ت و مه‌زناھی یا خود‌ایێ خوه‌ بێنه‌ بیر و به‌رێ خوه‌ بد‌ه‌ نعمه‌ت و قه‌نجی یێن وی و حازریا وی ژ بیر نه‌كه‌ و بێ ئه‌مری و نه‌فه‌رمانیا وی ته‌رك بد‌ه‌ و د‌ ڤی شه‌رێ مه‌زن د‌ا سه‌ر له‌شكه‌رێن شه‌یطانی بكه‌ڤه‌ و وه‌لاتێ خوه‌ بكه‌ وه‌لاتێ ره‌حمانی و حه‌ققانی و له‌شكه‌رێ حه‌ق ته‌عالا د‌ شوونا له‌شكه‌رێ شه‌یطانی د‌ا د‌ه‌ینه‌، د‌ا خود‌ایێ ته‌عالا ئاری ته‌ بكێ كو تو د‌ ڤێ خه‌باتێ د‌ا بگھێیی مه‌قام و مه‌رته‌به‌یه‌ك د‌ی و بگیژی مه‌ید‌انا مه‌زنتر یا شه‌ر كو ل پێش ته‌ یه‌؛ ئه‌و ژی جھاد‌ا گه‌ل نه‌فسێ یه‌ د‌ عاله‌ما باطن د‌ا و مه‌قامێ د‌ووێ یێ نه‌فسێ كو ئه‌مێ ژێ باخڤین؛ ئنشاء الله‌.

مه‌قامێ دووێ

ڤه‌بر: د‌ه‌رحه‌ق شه‌رێ له‌شكه‌رێ ناڤد‌ه‌یی یێ ره‌حمانی و شه‌یتانی د‌ا یه‌



back 1 2 3 4 5 6 7 next