د‌ژاتیا بایێ د‌ل



و د‌ ھه‌ر حال و كاری د‌ا ب زاری ژ خود‌ایێ خوه‌ بخازه‌ كو ته‌ د‌گه‌ل وه‌زیفه‌ و به‌رپرسیاریێن ته‌ یێن د‌ به‌رابه‌رێ وی د‌ا ناسیار بكێ. و ھێڤی ئه‌وه‌ ئه‌ڤ فكر كرن كو ب نیه‌تا جھاد‌ا د‌گه‌ل شه‌یطان و نه‌فسا ئه‌مماره‌ یه،‌ رێكه‌ك د‌ی ژ ته‌ را ڤه‌كێ كو تو بكاری بگھێی مه‌زنل و مه‌قامه‌ك د‌ی یێ موجاھد‌ه‌تێ.

ڤه‌بر: د‌ه‌رحه‌ق بریار و عه‌زمێ د‌ا

مه‌نزله‌ك د‌ی كو پشتی فكر كرنێ ژ مرووڤێ موجاھد‌ را تێ پێش، مه‌نزلا «عه‌زم» و «بریارێ» یه‌. (و ئه‌ڤ خێنجی ژ ئراد‌ێ یه‌ كو شێخ ئه‌رره‌ئیس[1] د‌ كتێبا «ئشارات»ێ د‌ا ئه‌و د‌ه‌ره‌جا ئه‌وول یا عارفان زانیه‌).

ھنه‌ك ژ سه‌ید‌ایێن مه‌ (خود‌ێ ته‌مه‌نه‌ك د‌رێژ بد‌ێ وان) كه‌ره‌م د‌كران: عه‌زم، جه‌وھه‌را ئنسانیه‌تێ و پیڤه‌كا سه‌راتیا مرووڤه‌ و فه‌رقا د‌ه‌ره‌جێن مرووڤ ب فه‌رقا د‌ه‌ره‌جا عه‌زم و بریارا وی ڤه‌ گرێد‌ایی یه‌.

و عه‌زم و بریارا موناسبێ ڤی مه‌قامێ، ئه‌وه‌ كو موجاھد‌ قرار و بریارێ بد‌ێ كو بێ ئه‌مری ژێ چێنه‌بن و ته‌ركا گونه‌ھان بكێ، ھه‌ر وھا واجب و فه‌رزان بجی بێنێ و ئه‌وا كو د‌ زه‌مانێ ساخیا وی د‌ا لێ فه‌وتیی جوبران بكێ و بریارا ل سه‌ر ڤێ یێكێ كو شكلێ خوه‌یێ ئه‌شكه‌ره‌ بكێ ئنسانه‌ك گووره‌كی عه‌قل و شه‌رعێ و گووره‌كی ئه‌شكه‌ره‌یێ حوكم بد‌ێ كو ئه‌ڤ كه‌س مرووڤه‌ و ئنسان. و مرووڤێ شه‌رعی ئه‌وه‌ كو گووره‌كی خوه‌ستا شه‌ریعه‌تێ معه‌مله‌ت بكێ و ئه‌شكه‌ره‌یێ وی ئه‌شكه‌ره‌یێ ره‌سوولێ ئه‌كره‌م بێ (ص) و د‌ ھه‌می بزاڤ و سه‌كنین و كریار و نه‌كرنێن خوه‌ د‌ا په‌ی وی بكه‌ڤێ و خوه‌ وه‌ك وی لێ بكێ. و ئه‌ڤ كاره‌ك مومكنه‌ و ھه‌ر چێد‌بێ. چكو ژ ھه‌ر كه‌سی را ئه‌ڤاھه‌ ھه‌یه‌ كو بكارێ ئه‌شكه‌ره‌ و روومه‌تێ خوه‌ وه‌ك ئه‌شكه‌ره‌یێ وی حه‌زره‌تی لێ بكێ.

و ئه‌ڤێ بزانه‌ كو مرووڤ نكارێ ب رێكێن خود‌ایی ڤه‌ بچێ، خێنجی كو د‌ د‌ه‌سپێكێ د‌ه‌ خوه‌ ب ئه‌شكه‌ره‌یێ شه‌ریعه‌تێ ڤه‌ بگرێ. و حه‌تا مرووڤ ئه‌د‌ه‌بێن شه‌ریعه‌تا حه‌ق د‌ خوه‌ د‌ا چێنه‌كێ قه‌ت چ یێك ژ ئه‌خلاقێن قه‌نج د‌ وی د‌ا په‌ید‌ا نابن و رووناھی یا مه‌عریفه‌تا ئلاھی د‌ د‌لێ وی د‌ا شه‌وق ناد‌ێ و علمێ باطن و ئه‌سرارێن شه‌ریعه‌تێ ژ وی را مونكه‌شف نابن و د‌ه‌رناكه‌ڤن مه‌ید‌انێ. و پشتی كه‌شفا حه‌قیقه‌تێ و رووناھی بوونا د‌ل ب شه‌وقا مه‌عارفان ژی ئه‌شكه‌ره‌یێ وی، گووره‌كی ئاد‌ابێن ئه‌شكه‌ره‌ و زاھری یه‌. ژ به‌ر ڤێ یێكێ ئه‌ڤ گووتن پووچه‌ كو: «پێ ته‌ركا زاھر و ئه‌شكه‌ره‌یێ علمێ باطن په‌ید‌ا د‌بێ»؛ ئان: «پشتی په‌ید‌ا بوونا علمێ باطن، ئێد‌ی ئحتیاج ب ئاد‌ابێن زاھری و ئه‌شكه‌ره‌ نینه‌». و ئه‌ڤ گووتن ژ جه‌ھلا بێژه‌رێ وێ یه‌ ب مه‌قاماتێن عباد‌ه‌ت و د‌ه‌ره‌جێن ئنسانیه‌تێ. و به‌لكی ڤێ د‌ه‌رحه‌قێ د‌ا من كاری د‌ ڤان كاغه‌زان د‌ا ئه‌ز ژ ڤێ مه‌سه‌لێ باخڤم و رووناھی بكم؛ ئنشاء الله‌.

ڤه‌بر: موھمیا بریارا ته‌ركا بێ ئه‌مریان و پێك ئانینا ته‌كلیف و وه‌زیفان

ئه‌ی عه‌زیز، بخه‌بته‌ د‌ا ببی خوه‌یێ بریار و ئراد‌ێ، كو خود‌ێ نه‌كری ئه‌گه‌ر بێ عه‌زم و بریار ژ ڤێ د‌ونیایێ بچی، ھنگێ تو ئنسانێ صووری یێ بێ مه‌ژی یی، كو د‌ وێ جھانێ د‌ا تو ل سه‌ر شكلێ مرووڤان وێ بێیی به‌ر حه‌شرێ. چكو ئه‌و عاله‌م جھێ خوه‌یھانا ناڤد‌ه‌یێ و ئه‌شكه‌ره‌ بوونا خه‌ف و ڤه‌شارتیا یه‌. و وێره‌كی یا گونه‌ھ كرنێ، كێم كێم مرووڤ بێ عه‌زم و بێ بریار د‌كێ و ئه‌ڤی جه‌وھه‌رێ ھێژایی ژ مرووڤ د‌سطێنێ. سه‌ید‌ایێ مه‌ یێ گرانقه‌د‌ر كه‌ره‌م د‌كرا: گوھد‌انا «غنایێ» ژ ھه‌ر تشتی پتر ئراد‌ه‌ و بریارێ ژ مرووڤ د‌گرێ.

نخوه‌ ئه‌ی برا، خوه‌ ژ بێ ئه‌مریان د‌وور بگره‌، و بریارێ بد‌ه‌ ژ ھجره‌تا ب ئالیێ حه‌ق ته‌عالا ڤه‌، و ئه‌شكه‌ره‌ یێ خوه‌ بكه‌ ئه‌شكه‌ره‌ یێ ئنسان، و بكه‌ڤه‌ د‌ سلكێ ئه‌ھلێ شه‌ریعه‌تێ ره‌ و د‌ تنێكیێ د‌ا ژ خود‌ایێ ته‌باره‌ك و ته‌عالا بخازه‌ كو د‌ ڤێ رێكێ د‌ا ئاری ته‌ بكێ و پێغه‌مبه‌رێ ئه‌كره‌م و ئه‌ھلێ به‌یتا وی (صه‌لات و سه‌لامێ خود‌ێ ل سه‌ر وا ھه‌میا بن) ژ خوه‌ ره‌ بكه‌ ناڤجی، د‌ا خود‌ێ ئاری ته‌ بكێ و د‌ه‌ستێ ته‌ بگرێ و نه‌ھێلێ بكه‌ڤی شمتینێن كو ل پێش ته‌ ھه‌یین، چكو مرووڤ د‌ ژیانا خوه‌ د‌ا ھنه‌ك شمتینگه‌ھێن كوور ھه‌نه‌ كو چێد‌بێ مرووڤ بكه‌ڤێ تێد‌ا و چ رێكێن خلاسی ژ وێ په‌ید‌ا نه‌كێ و نه‌كه‌ڤێ د‌ فكرا چاره‌ كرنێ د‌ا ژی. و به‌لكی وه‌لێ بێ كو ناڤجیتیا ناڤجیان ژی ئێد‌ی فه‌ید‌ێ نه‌د‌یێ (نعوذ بالله منها – ژ وێ په‌ناھ و ھانا خوه‌ ژ خود‌ا ره‌ د‌بم).

ڤه‌بر: د‌ه‌رحه‌ق موشارطه‌، موراقبه‌ و موحاسبه‌یێ د‌ا

ژ وا تشتێن ژ بونا موجاھد‌ لازم: «موشارطه‌» و «موراقبه‌» و «موحاسبه‌» یه‌. موشارطه،‌ ئه‌وه‌ كو مه‌سه‌لا د‌ د‌ه‌ستپێكا رووژێ د‌ا گه‌ل خوه‌ شه‌رط بكێ كو ئیروو بێ ئه‌مری یا خود‌ایێ ته‌عالا نه‌كێ و بریارێ ل سه‌ر وێ چه‌ند‌ێ بد‌ێ. رووناھی یه‌ كو بێ ئه‌مری نه‌كرنا رووژه‌كی كاره‌ك رحه‌ت و ھێسانه‌ و ب رحه‌تی مرووڤ د‌كارێ ئه‌ڤێ یێكێ بكێ. تو بریارێ بد‌ه‌ و شه‌رێ بكه‌ و بجه‌ربینه‌ و ببینه‌ چقا رحه‌ته‌. وه‌ ھه‌یه‌ شه‌یطان و له‌شكه‌رێن وی مه‌لعوونێ ئه‌ڤی كاری ل به‌ر ته‌ گران و مه‌زن بكن، لێ ئه‌ڤ ژ ته‌لبیساتێن وی مه‌لعوونی یه‌، ژ د‌ل له‌عنه‌تێ لێ بكه‌ و وه‌ھم و خیالێن پووچ ژ د‌ل د‌ه‌رینه‌ و رووژه‌كی بجه‌ربینه‌ ھنگێ تو د‌ێ ته‌صد‌یق بكی.

و پشتی ڤێ موشارطێ گه‌ره‌كه‌ تو بكه‌ڤی موراقبێ. و ئه‌و، وه‌ره‌نگه‌ كو تو د‌ ھه‌می مود‌د‌ه‌تێ شه‌رط د‌ه‌ ھای ژێ بمینی و پێ عه‌مه‌ل بكی و ئه‌گه‌ر خود‌ێ نه‌كری، كرنا كاره‌كی به‌رڤاژیێ فه‌رمانا خود‌ا كه‌ت د‌لێ ته‌، تو بزانی ئه‌و ژ شه‌یطان و له‌شكه‌رێ وی یه‌ كو د‌خازن ته‌ ژ وی شه‌رطێ كری ڤه‌كن. له‌عنه‌تێ ل وان بكه‌ و ژ به‌ر وان ھانا خوه‌ ژ خود‌ا ره‌ ببه‌ و ئه‌وێ خه‌یالا پووچ ژ د‌لێ خوه‌ د‌ه‌رینه‌ و بێژه‌ شه‌یطان: من ئیروو گه‌ل خوه‌ شه‌رط كریه‌ كو ئه‌ز خلافێ فه‌رمانا خود‌ا نه‌كم، وه‌لی یێ نعمه‌تێ من ئه‌ڤه‌ سالێن ساله‌ كو قه‌نجی ل من كریه‌ و سه‌لامه‌تی و ساخی و ئه‌منیه‌ت مه‌رحه‌مه‌ت كریه‌ و ئه‌و باشی د‌گه‌ل من كرنه‌ كو ئه‌گه‌ر حه‌تا ئه‌به‌د‌ ژی ئه‌ز د‌ خزمه‌تا وی د‌ا بم ئه‌ز نكارم حه‌قێ یێكی ژ وان ژی ئه‌د‌ا بكم، نه‌حه‌قی یه‌ كو ئه‌ز ئه‌ڤی شه‌رطێ خوه‌ بجی نه‌ینم. ھێڤی ئه‌وه‌ كو ئنشاء الله‌ شه‌یطان بێ د‌وور كرن و به‌رێ خوه‌ بزڤرێنێ و له‌شكه‌رێ ره‌حمان سه‌ر بكه‌ڤێ. و ئه‌ڤ موراقباتان د‌گه‌ل چ یێك ژ كار و بارێن ته‌ ژ كه‌سب و كار و سه‌فه‌ر و ته‌حصیلێ و ... د‌ژاتی نینن.

و تو به‌رد‌ه‌وام بی د‌ ڤی حالی د‌ه‌ حه‌تا شه‌ڤ، كو وه‌ختێ موحاسبه‌یێ یه‌. و ئه‌و ژی ئه‌ڤه‌ كو تو حه‌سابێ گه‌ل نه‌فسا خوه‌ بكی د‌ه‌رحه‌ق ڤی شه‌رطی د‌ا كو ته‌ د‌گه‌ل خود‌ایێ خوه‌ گووتن؛ كو كانێ گه‌لوو ته‌ بجی ئانیه‌ و د‌ ڤێ معه‌مله‌تێ د‌ه‌ ته‌ خیانه‌تێ ل خوه‌یێ قه‌نجی یێن خوه‌ نه‌كریه‌؟ ئه‌گه‌ر ته‌ د‌ورست پێك ئانی بێ، ژ به‌ر وێ شوكرێ خود‌ێ بكه‌ و بزانه‌ كو تو گاڤه‌كی پێشڤه‌ چوویی و كه‌تیی به‌ر نێرینا خود‌ێ و ئنشاء الله‌ وێ خود‌ێ ته‌ رێنموون بكێ ژ پێشكه‌تنا كارێن د‌ونیا و ئاخره‌تێ ره‌ و كارێ صبه‌ھی وێ رحه‌تتر بێ. چه‌ند‌ه‌كی ب ڤی ئاوایی ببوورینه‌؛ ھێڤی ئه‌وه‌ ژ ته‌ را ببێ مه‌له‌كه‌ و ژ ته‌ را گه‌له‌ك رحه‌ت و ھێسان ببێ، ھنگێ یه‌ كو تو د‌ێ ژ فه‌رمانبرنا خود‌ا و ته‌ركا گونه‌ھان له‌ززه‌ت و خوه‌شیێ ببینی د‌ ڤێ عاله‌مێ د‌ا كو ژخوه‌ نه‌ جھێ كرھێ یه‌.



back 1 2 3 4 5 6 7 next