فه‌ده‌ك



ھه‌ما ژ ڤێده‌رێ ئه‌م پێ د‌حه‌سن كو مه‌سه‌له‌ چقا گران بویه، د‌ژمنی چقاس د‌ژوار بویه‌ و حه‌تا ب چ ده‌ره‌جێ دووراتیا ژ شیعه‌یێن ئه‌ھلێ به‌یتێ موھم ھاتیه‌ گرتن و حه‌زکرن و حوببا ئه‌ھلێ به‌یتێ رافزیتی ھاتیه‌ حه‌ساب كرن، چه‌وا كو شافعی پێ ڤێ ڤه‌ھوونانا خوه‌ ژ مه‌ را رۆناھی کری:

ده‌ما ل جڤاته‌کی دا به‌حسا عه‌لی و دو زارووکێن وی و فاطمه‌یا پاقژ بێ کرن، دبێژنێ: فلانی زێده‌گاڤیان نه‌که‌، ئه‌ڤاھه‌نێ خه‌به‌ردانێن رافزیا نه‌، ئه‌ز دوورم ژ وان مرووڤێن کو رافزیتیێ حه‌زکرنا ژ فاطمایێ دبینن.

ھه‌ر وھا دبێژێ: گووتن من: تو بوویی رافزی، من گووت: ئه‌به‌دا، رافزیتی نه‌ دینێ منه‌ و نه‌ باوه‌ریا منه‌؛ لێبه‌لێ بێ شک و شوبھه‌ ئه‌ز ولایه‌تا وی ئمامێ رێراستکه‌ر قه‌بوول دکم، ئه‌گه‌ر حه‌زکرنا ژ وه‌صی رافزیتی بێ، ڤێجا ئه‌ز رافزیترینێ خه‌لکێ مه‌.[16]

خه‌طیب، خوه‌ش گووتنه‌ک ھه‌یه‌ ده‌رحه‌ق فه‌تحێ کورێ شه‌خره‌ف دا، دبێژێ: خه‌و که‌ت چاڤێ من ڤێجا ئه‌ز رازام، من ل خه‌ونا خوه‌ دا دیت کو دو که‌س ل بال منن ڤێجا من یێ نێزیكترێ خوه‌ را گووت: تو کی یی؟ ئه‌وی گووت: ئه‌ز ژ زارووکێن ئاده‌مم، من گووت: ئه‌م ھه‌می ژ زارووکێن ئاده‌مین، لێ ڤێجا ئه‌وێ ل کێله‌کا ته‌ دا کی یه‌؟ گووت: عه‌لیێ کورێ ئه‌بوو طالبه‌، من گووتێ: تو نێزیکێ وی یی تو چره‌ پرسیارێ ژێ ناکی، ئه‌وی گووت: ترسا من ژ ڤێ یه‌ کو خه‌لک بێژن من ئه‌ڤێھه‌ رافزی یه‌.[17]

فه‌زلێ کورێ ده‌کین بوو شیعه‌، ڤێجا رۆژه‌کی کورێ وی ب گری ڤه‌ ھات بالێ، ئه‌وی گووتێ: چ بویه‌‌ ژ ته‌؟ کورێ وی گووتێ: خه‌لک دبێژن کو تو بوویی شیعه‌. ڤێجا شعره‌ک ب ڤێ مه‌عنێ ڤه‌ھوونا: خه‌لک ده‌رحه‌ق ته‌ دا تشتا دبێژن کو ئه‌ز نکارم جه‌وابا وان بدم.[18]

ئه‌ڤ مه‌سه‌لا ھه‌نێ کو ئه‌و زارووک ئه‌وقاس بترسێ و ژ بابێ خوه‌ را بگری حه‌قیه‌ته‌ن تشته‌کی گه‌له‌ک مه‌زنه‌، نه‌ عه‌جێبه‌ ژی کو ب ڤی ئاوایی ژ بابێ خوه‌ را بگری، چکو ترسا وی ھه‌بوو ژ به‌ر وێ قانوونا ده‌وله‌تێ ده‌رحه‌ق شیعه‌یان دا ھه‌یی بابێ وی بێ کوشتن و مالا وی بێ ھه‌رفاندن و مالێ وی بێ تالان کرن، ئه‌وا ئه‌ڤ قانوون بکار دبرا ده‌رحه‌ق وان که‌سان دا كو مه‌یلا عه‌له‌وییان ل بال وان ھه‌بێ.

ئبراھیم کورێ ھه‌رسه‌مه‌ شاعره‌ک گرانقه‌در بویه‌‌، ئه‌وی ده‌رحه‌ق ئه‌ھلێ به‌یتێ و په‌صنێ وان دا ھنه‌ک شعر گووتن، پچه‌ک ژ وێ شعرێ ئه‌ڤاھه‌نێ یه‌:

چقاس لوومه‌ ل من تێ كرن ژ به‌ر حه‌زکرنا ژ وان، لێ ھه‌ما براستی ئه‌ز حه‌ژ زارووکێن فاطمایێ دکم، زارووکێن که‌چا وی که‌سێ ئایه‌تێن موحکه‌م ئانیین، ئه‌و که‌سێ دین و سوننه‌ت ژ مه‌ را ئانیی، ڤێجا ئه‌ز حه‌ژ وان دکم ژ به‌ر کو خودێ گه‌له‌ک نعمه‌تێن ئه‌شکه‌ره‌ دانه‌ وان.

ڤێجا ده‌ما چوو بال مه‌نصوور، مه‌نصوور وھا گووتێ: وه‌ی نه‌ مه‌رحه‌با ژ ته‌ را ئه‌ی ئبراھیم، من بھیستیه‌ کو ته‌ ھنه‌ک تشت گووتنه‌، ئه‌گه‌ر نه‌ ئه‌و ھێژانا ته‌ بوویا کو تو سه‌راتری ژ ھه‌ڤالێن خوه‌، منێ به‌لایه‌ک ئانیبوویا سه‌رێ ته‌، د‌ێ بێژه‌ كو ته‌ خرابی كریه‌. ڤێجا ئه‌وی عوزرێ خوه‌ ڤه‌خوه‌ست و ژێ خوه‌ست کو لێببوورێ، ئه‌و ژی لێبووری و گووتێ: ئه‌گه‌ر جاره‌ک دی بگه‌ھێ گوھێ من کو ته‌ تشته‌ک وھا کریه‌ ئه‌زێ ته‌ بکوژم. ڤێجا ده‌ما ئبراھیم چوویی مه‌دینایێ یێک ژ عه‌له‌وییان ھات بالێ و سه‌لام دایێ، ئبراھیم گووتێ: خوه‌ ژ من دوور بێخه‌، خوونا من نه‌رێژه‌.[19]

مه‌نصوورێ نومه‌یری چه‌ند شعره‌ک ده‌رحه‌ق ئه‌ھلێ به‌یتێ دا ڤه‌ھوونان، ڤێجا كه‌ربێ ره‌شید‌ ھاتن و عه‌نری و ھنه‌ک رێکرن دا ئه‌وی بکوژن، ده‌ما چوون دا ئه‌وی بکوژن وه‌کی دیتن مریه‌. په‌ی را رشید‌ گووت: نییه‌تا من ئه‌و بو ئه‌ز زمانێ وی ژ پاطکا وی را د‌ه‌رینم. ڤێجا كه‌ت د‌لێ وی کو ھه‌ستیێن وی ژ گۆرێ د‌ه‌رێنێ و بشه‌وتێنێ، لێ نه‌كر.[20]



back 1 2 3 4 5 6 7 8 9 10 11 next