ئنسان د‌ پیڤه‌كا نه‌ھجول به‌لاغێ د‌ا



مرووڤێ كامل : خوتبه‌ 87- به‌نده‌یێن خودا! خوه‌شدڤێترین به‌نده‌یێ خودێ لبال وی، ئه‌وه‌ یێ خودێ ئاریكاری یا وی كربێ ژ بوونا سه‌ركه‌تنا لسه‌ر نه‌فسێ، ڤێجا خه‌مداری كربێ نیشانا خوه‌ و طرسا ژ خودێ كربێ جلكێن خوه‌، چرا هدایه‌تێ ل دلێ وی دا هلبیبێ و ژ بونا رووژا مرنا خوه‌ رزق و زاده‌ك حازر كربێ... ڤێجا ژ كووریتی یێ و ژ هه‌ڤاله‌تی یا وا یێن په‌ی بایێ د‌ل،‌ ده‌ركه‌تبێ و بیبێ ژ كلیدێن ده‌رگه‌هێ هدایه‌تێ، وده‌رگه‌هێن پیساتی و ل رێ وندا بینێ لبه‌ر خوه‌ گرتبێ ؛ ئه‌وێ رێكا پێڤه‌چوونێ و نیشانا خوه‌ ناس كری و خوه‌ ژ گه‌راڤێ خلاس كری و ب پێ باوه‌رترین چه‌كال و وه‌ریسان گرتی.

.. سه‌ر یه‌قینه‌ك وه‌ك رووناهی یا رووژێیه‌ .. رێناسێ هه‌می ده‌شت و چوولا یه‌.. ئه‌وی عداله‌ت ژ خوه‌ره‌ كریه‌ هه‌ڤرێ، و یێكه‌مین كارێ وی یێ عاد‌لانه‌، ئه‌وه‌ كو هه‌وایێ نه‌فسێ و بایێ د‌ل ژ خوه‌ دویر كریه‌. حه‌قی یێ دبێژێ و پێ عه‌مه‌ل دكێ، قه‌ستا ھه‌می خێر و قه‌نجییان د‌‌كێ، چقاس تشتا كو گومانا باشی یێ ژێ تێ برن ئه‌و به‌رێ خوه‌ دد‌یێ. ئه‌وی خوه‌ سپارتی یه‌ كتێبا خودێ ؛ قورئانێ، ڤێجا ئه‌و سه‌ر پێش و رێبه‌رێ وی یه‌، قورئان بارێ خوه‌ ل كویدێ ده‌ینێ ئه‌و ژی ل وێدێ داتینێ و ل كوێدێ بسه‌كنێ ئه‌و ژی دسه‌كنێ.

به‌له‌نگازیا مرووڤ . حكمه‌تا 419 : چ به‌له‌نگازه‌ به‌نی ئاده‌م، ئه‌جه‌لێ وی ڤه‌شارتی، نه‌خوه‌شی یێن وی خه‌ف و نه‌دیار و عه‌مه‌ل و کریارێن وی پارازتی نه‌، پێشوویه‌ک ئه‌وی دئێشێنێ و قورته‌ک ئاڤا د گه‌ریێ دا مایی ئه‌وی دکوژێ و خوهدان ئه‌وی گه‌نی و بێھنوو دکێ.

عه‌جێبه‌ك ژ عه‌جێبان . حكمه‌تا 8 : مرووڤ چقا عه‌جێبه‌!: پێ پچه‌ک به‌ز دبینێ و پێ پچه‌ک گووشت دئاخڤێ و پێ قه‌ته‌ک هه‌ستی گوهلێ دبێ و د که‌لشه‌کی را نه‌فه‌سێ دکێشێ!

حالێ مرووڤان د‌ د‌ونیایێ د‌ا: حكمه‌تا 191 ● مرووڤ د دنیایێ دا وه‌ک کێلکێ یه‌ کو مرن لێ تێ وه‌راندن.. گه‌ل هه‌ر قورته‌ک ئاڤا وێ ئێش و ئاسێبوونه‌ك و د‌ هه‌ر پاریه‌ک یا وێ دا ژی د‌ گه‌ریێ را مانه‌ك ھه‌یه‌. مرووڤ چقا خوه‌شییه‌كی د‌ه‌ستڤه‌ بێنێ خوه‌شییه‌كی ژ د‌ه‌ست د‌د‌ێ؛ ناچێ پێشوازی یا رووژه‌کی خێنجی کو رووژه‌کی ژ عه‌مرێ خوه‌ ببوورێنێ.

خوتبه‌ 88 : سالا 36 ێ ھجری ل مه‌د‌ینایێ وھا خه‌به‌ر د‌ایه‌:.. د‌ زه‌حمه‌تی یێن د‌نیایێ د‌ا ده‌رس و عبره‌ت هه‌نه‌، لێ نه‌ هه‌ر خودان دله‌ك تێ گه‌هشتی یه‌ و نه‌ حه‌چی گوھ هه‌یی سه‌حكه‌ره‌ و نه‌ژی هه‌می یێن چاڤ هه‌یین بینه‌رن.. تشته‌ك عه‌جێبه‌! ھه‌ر یێكی ژ رێك و مه‌سله‌كا خوه‌ را دلیله‌ك جدا هه‌یه‌. نه‌دكه‌ڤن په‌ی ده‌وسا چ پێغه‌مبه‌ران و نه‌ ژ جیكرێ پێغه‌مبه‌ران په‌یره‌وی دكن و باوه‌ریا وان ب "غه‌یبێ" نینه‌ و خوه‌ ژ عه‌یب و كیماسییان نادن پاش. كارێ وان لسه‌ر ئه‌ساسێ شك و شوبهێ یه‌، و گاڤێن خوه‌ ل په‌ی بایێ د‌ل تاڤێژن. ل بال وان قه‌نجكاری ئه‌وه‌ یا ل وان خوه‌ش بێ، و نه‌ قه‌نجی ئه‌وه‌ یا نه‌ لسه‌ر ڤیانا وان بێ، ل زه‌مانێ گیرو گرفتا دا هانا خوه‌ ژ خوه‌را تینن، و ل به‌رابه‌رێ تشتێن نه‌كفشه‌ پالگه‌ها وان بیر و هزرا وان بخوه‌یه‌، حه‌چوه‌كو هه‌ر یێك ژ وان پێشكێشێ خوه‌یه‌، و دبێژێ قه‌ی ئه‌وه‌ یێ خو ب قولپكێن جهێ باوه‌ریێ و سه‌به‌بێن قه‌وی ڤه‌ گرتی.

ناما 31 : قَلْبُ الْحَدَثِ كَالارْضِ الْخَالِيَةِ مَا ألْقِيَ فِيهَا مِنْ شَيء قَبِلَتْهُ ...

دلێ جوانا‌ وه‌ک عه‌رد و زه‌ڤیا ڤاله‌ یه‌، تو چ لێ بره‌شینی ئه‌وێ قه‌بوول دکێ و تێدا شین دبێ...

.. دنیاخاز، ئه‌و كووچكن‌ كو د‌ره‌یێن؛ درندێن حرحرکه‌رن کو د سه‌رێ هه‌ڤدا دخوڕن و یێ قه‌وی ئه‌وێ شکه‌ستی دخوێ و یێ مه‌زن سه‌رده‌ستیێ ل یێ بچووک دکێ؛ د‌ه‌وارێن گووڤان و چوولانه‌؛ د‌ دوولا پر ئافه‌ت دا هاتنه‌ به‌ردان و ل عه‌ردێ خیزی دا که‌تنه‌ رێ کو تێراچوون بزه‌حمه‌ته‌، نه‌ شڤانه‌ک هه‌نه‌ کو ئه‌وا به‌رهه‌ڤ بکێ نه‌ ژی که‌سه‌ک کو ئه‌وا ببێ جهه‌کی و بگهێنێ چێرینگه‌هه‌کی؛ دنیا ئه‌وان بئالیێ کووره‌رێکان ڤه‌ دئاژوو و چاڤێ وان ژ رووناهی یا چرایا هدایه‌تێ مه‌حرووم کریه‌، ڤێجا د چوولا وێ دا شاش و حه‌یری مانه‌.. ژ د‌نیایێ پێڤه‌ قه‌ت چ مه‌لحه‌زه‌ نینن.

پیڤه‌كا قه‌د‌ر و قیمه‌ت: حكمه‌تا 47: قیمه‌تێ مرووڤ قاس هممه‌تا وی ، دورستی قاس جامێری یا وی ، مێرباشی یا وی قاس شه‌رما وی، شه‌ره‌فا وی ژی قاسی غیره‌تا وی یه‌.



back 1 2 3 4 5 next