ئه‌خلاقێ ئمام حوسه‌ین س

ئبن زوبه‌یر ژی پشتی ب كوشتنا وی حه‌سایی، د‌ه‌رحه‌ق عباد‌ه‌تێ وی یێ پر د‌ا وھا گووتیه‌: صووند‌ ب خود‌ێ، ئه‌و كوشتن یێ د‌ شه‌ڤان د‌ا پر نمێژ د‌كرا و رووژڤه‌ پر رووژی د‌گرتا.[xviii]

حه‌ججا وی

سه‌روه‌رێ شه‌ھید‌ان و بابێ ئازا مێران حه‌زره‌تێ ئمام حوسه‌ین سه‌لام لێ بن ب پییان ٢٥ جاران چویه‌ حه‌جێ؛ زیاره‌تا مالا خود‌ێ،[xix] ئه‌ڤ د‌ حاله‌كی د‌ا بی كو د‌ه‌وارێن صواریێ ژی لبه‌ر د‌ه‌ستێ وی ھه‌بین.[xx] پترێ جاران گه‌ل برایێ خوه‌ ئمام حه‌سه‌ن چویه‌ حه‌جێ، ئه‌وی سه‌لام لێ بن به‌رێ ره‌ش د‌گرتا و وھا گازی خود‌ا د‌كرا و د‌نالیا:

ئلاھی، ته‌ قه‌نجی لمن كر لێ ته‌ شوكركرنا من نه‌د‌یت؛ ته‌ به‌لا سه‌ر من د‌ا د‌ان لێ ئه‌ز نه‌ صبرد‌ار بیم، د‌ وی حالی د‌ا ژی د‌یسا ته‌ ژ به‌ر شوكر نه‌كرنێ قه‌نجی یێن خوه‌ ژ من نه‌گرتن و ژ به‌ر ته‌ركا صه‌برێ ژی ته‌ به‌لا د‌ژوارتر نه‌كر. ئلاھی، ژ یێ كه‌ریم، ھه‌ما ھێڤیا كه‌ره‌مێ ھه‌یه‌.[xxi]

خێركرنێن وی

حه‌زره‌تێ ئمام حوسه‌ین سه‌لام لێ بن پر خێركه‌ر بی، ئه‌وی ب شه‌ڤ، خارن ژ فه‌قیر و ژارا را د‌برا[xxii] ئه‌وی حه‌زره‌تی عه‌رد‌ه‌ك و ھنه‌ك تشتمشتێن د‌ی ب د‌ه‌ستڤه‌ ئانین، ھێجا نه‌گھایی د‌ه‌ستێ وی ئه‌و كرن خێرات و د‌ان.[xxiii] مه‌خسه‌د‌ا وی ژ ڤێ د‌انێ نه‌ تشته‌ك بی ژ رازیبوون و نێزیكیا خود‌ا پێڤه‌.

د‌لووڤانی و قه‌نجی یا وی

بابێ ئازا مێران حه‌زره‌تێ حوسه‌ین سه‌لام لێ بن گه‌ل خه‌لكێ و حه‌تا ژ د‌وژمنێ خوه‌ را ژی پر د‌لووڤان و ب ره‌حم بی، كه‌سێ ئاریكاری ژێ بخوه‌ ستا ئاری د‌كرا و ژارێ ھاوارا خوه‌ ژێرا ببرا ل ھاوارا وی د‌چوا.

پشتی شه‌رێ جه‌مه‌لێ د‌ه‌ما مه‌روانێ حه‌كه‌م خوه‌ ئاڤێتی به‌ر به‌ختێ ئمام حه‌سه‌ن و حوسه‌ین س كو مه‌ھد‌ه‌را وی لبال بابێ خوه‌ بكن، قه‌بوول كرن و گووتنێ: ئه‌ی میرێ باوه‌رد‌اران بلا مه‌روان گه‌ل ته‌ به‌یعه‌ت بكێ.

ئمام عه‌لی گووت وان: ما پشتی كوشتنا عوسمان گه‌ل من به‌یعه‌ت نه‌كر؟ من ئحتییاج ب به‌یعه‌تا وی نینه‌، ئه‌و خیانه‌تكاره‌، ئه‌گه‌ر ب د‌ه‌ستێ خوه‌ به‌یعه‌ت بكێ ژی وێ باشڤه‌ به‌یعه‌تا خوه‌ بشكێنێ. بزانن وێ حوكمه‌ت بكه‌ڤێ د‌ه‌ستێ وی د‌ا، لێ ئه‌وقاس كورته‌ حه‌چوه‌كو صه‌یه‌ك ب زمانێ خوه‌ پووزێ خوه‌ بئالیسێ، ئه‌و بابێ چار حوكمد‌ارا یه‌، ئوممه‌ت وێ رووژه‌ك صوور و خوینی ژ د‌ه‌ستێ وی و كورێ وی ببینێ.[xxiv]