شکلێ قیامه‌تێ د قورئانێ دا

شکلێ قیامه‌تێ د قورئانێ دا

پێشه‌کی

ژ قورئانێ تێ فێهمێ کو رابوونا قیامه‌تێ نه‌ هه‌ما ته‌نێ پێ ساخ بوونا دوباره‌ یا مرووڤ پێک تێ به‌لکێ هه‌می تشت ته‌ڤهه‌ڤ دبێ و سیستما عاله‌مێ سه‌روبنوو دبێ و عاله‌مه‌ک دی پێ هنه‌ک تایبه‌تیێن دی په‌یدا دبێ، عاله‌مه‌ک وه‌ره‌نگ کو ئه‌م نکارن تێ بگهێن کا چه‌وانه‌ و ئه‌م هوور و کوور نکارین ژ تایبه‌تیێن وێ بزانین. ڤێجا هنگێ یه‌ کو مرووڤ هه‌می، ژ ئه‌ول حه‌تا ئاخر ساخ دبن و دگهێن ده‌ستهاتا کار و عه‌مه‌لێ خوه‌ و ژ هه‌ر و هه‌ر را د ناڤ خوه‌شیان دا ئان د عه‌زابێ دا دمینن.

چکو ئایه‌تێن ڤێ ده‌رحه‌قێ دا پر زێده‌ نه‌ و ئانینا هه‌میان گووتنێ درێژ دکێ؛ ئه‌مێ هه‌ما ژ ناڤه‌رووکا هنه‌کا ته‌نێ باخڤن.

حالێ عه‌رد و به‌حر و چیان

له‌رزینه‌ک مه‌زن د عه‌ردێ دا په‌یدا دبێ[1] و حه‌چی یا د ناڤ دا یه‌، وێ ده‌رکه‌ڤێ مه‌یدانێ (زلزال / 2، ئنشقاق / 4) و قه‌ت و پچێن وێ د‌ێ ژ هه‌ڤ بلاڤ ببن و پچ پچ ببێ (حاققه‌ / 14، فه‌جر / 21)؛ وێ به‌حر بکه‌لشن و شه‌ق ببن (ته‌کویر / 6، ئنفطار / 3) و چیا بهه‌رکن[2] و بپه‌رچقن و سه‌ر هه‌ڤ دا بچن (حاققه‌ / 4، واقعه‌ / 5) وێ وه‌ک گرگه‌ک یێ خێزێ لێ بێن (موززه‌ممل / 14) و پاشێ وێ وه‌ک هریا هاتی ژه‌نێن لێ بێن (مه‌عارج / 9، قارعه‌ / 5) ڤێجا وێ ل هه‌وا ره‌ بلاڤ ببن (طاها / 105 – 107، مورسه‌لات / 10) و ژ وان چیایێن بلند خێنجی ژ سه‌راب و له‌یلانه‌کی تشته‌ک نامینێ (که‌هف / 8، نه‌به‌ء /20).

حالێ عه‌سمان و ستێران

هه‌یڤ (قیامه‌ت / 8) و رووژ (ته‌کویر / 1) و ستێرێن مه‌زن کو هنه‌ک ژ وان چه‌ند میلیون جارا ژ رووژێ مه‌زنتر و رووناهی ترن، طاری دبن و رووناهیا وان ژ وا تێ گرتن (ته‌کویر / 2)، و سیستم و بزاڤ و حه‌ره‌که‌تا وان تێک دچێ و رووژ و هه‌یڤ دگهێن هه‌ڤ (ئنفطار / 2، قیامه‌ت / 9) و ئه‌و عه‌سمانێ کو وه‌ک بانه‌کی ل سه‌ر ڤێ جهانێ دا گرتیه‌ وێ سست ببێ و ژ هه‌ڤ بکه‌ڤێ (طوور / 1، حاققه‌ / 16) و بکله‌شێ و قه‌ت قه‌ت ببێ (ره‌حمان / 37، حاققه‌ / 16، موززه‌ممل / 18، مورسه‌لات / 9، نه‌به‌ء / 19، ئنفطار / 1، ئنشقاق / 1) و وێ ل هه‌ڤ بێ پێچان (ئه‌نبیاء / 104، ته‌کویر / 11) و وێ وه‌ک هێسنێ حه‌لهایی لێ بێ (مه‌عارج / 8) و وێ هه‌وایێ جهانێ ته‌ژی دووی و عه‌ور ببێ (فورقان / 25، دوخان / 10).

صوورا مرنێ

د ڤی حالی دا وێ صوورا مرنێ بێ پفدان و هه‌می تشتێن ساخ وێ بمرن (زومه‌ر / 68، حاققه‌ / 13، یاسین / 49) د جهانا ته‌بیعه‌ت دا ئه‌سه‌ره‌ک ژ ژیانێ نامینێ و طرس و ده‌هشه‌ت و بزدهان دکه‌ڤێ د رح و جانا دا (نه‌مل / 87 – 89) خێنجی ژ وایێن ژ ره‌مز و رازێن جهانێ ئاگاهی هه‌بوون و دلێ وا ته‌ژی ژ ناسین و حه‌زکرنا خودا.