په‌یوه‌ندا دونیا و ئاخره‌تێ

په‌یوه‌ندا دونیا و ئاخره‌تێ

پێشگووتن

مه‌ زانی كو ژیانا مرووڤ ھه‌ما نه‌ ئه‌وه‌ ل ڤێ دونیایێ دا به‌لكی وێ دیسا ساخ ببێ و ھه‌ر و ھه‌ر د عاله‌ما ئاخره‌تێ دا ساخ بمینێ. ھه‌ر وھا مه‌ زانی كو ژیانا ئاخره‌تێ یه‌ ژیانا حه‌قیقی و راستی، ب ئاوایه‌ك وه‌ره‌نگ حه‌تا كو د به‌رابه‌رێ وێ دا نه‌ لایقه‌ مرووڤ ناڤێ ژیانێ ده‌ینێ سه‌ر ژیانا دونیایێ.

نھا دوور گھایه‌ وێ یێكێ كو ئه‌م به‌حسا گرێدانا د ناڤبه‌ینا دونیایێ و ئاخره‌تێ دا بكین. ئه‌لبه‌ت ژ گووتنێن پێشدا قه‌ده‌ره‌كی ئه‌ڤ گرێدان رووناھی بوو. لێ ژ به‌ر خوه‌ھر فكری یێن ڤێ ده‌رحه‌قێ دا ھه‌یین باشه‌ كو ئه‌م پتر ڤێ ده‌رحه‌قێ دا باخڤین، دا كو پێ ده‌لیلێن عه‌قل و گووتنێن قورئانی گرێدان و په‌یوه‌ندا ناڤبه‌ینا دونیا و ئاخره‌تێ دا ھه‌یی رووناھیتر ببێ.

دونیا زه‌ڤیا ئاخره‌تێ یه‌

گووتنا مه‌ یا ئه‌ول ڤێ ده‌رحه‌قێ دا ئه‌وه‌ كو سه‌عاده‌ت و شه‌قاوه‌تا (به‌خته‌وه‌ری و به‌ختره‌شی) ئاخره‌تێ ل په‌ی معه‌مله‌ت و كریارێن مرووڤه‌ د دونیایێ دا. نه‌ وه‌ر‌نگه‌ كو ژ ده‌ستڤه‌ ئانینا خوه‌شیێن ئاخره‌تێ را مرووڤ بكارێ ل وێده‌رێ كار و خه‌باته‌كی بكێ، ئان ئه‌وێ قویتر و عه‌قلمه‌ندتر بكارێ خوه‌شیێن زه‌حفتر ده‌ست خوه‌ ڤه‌ بێنێ ئان ئه‌وێ حیله‌بازتر بكارێ ژ ده‌ستھاتا یێن دی ژ خوه‌ ره‌ ببێ، چه‌وا كو ھنه‌ك نه‌زان وه‌ره‌نگ گومان دكن و عاله‌ما ئاخره‌تێ ب ته‌مامی ژ عاله‌ما دونیایێ جودا حه‌ساب دكن.

قورئانا پیرووز ژ ده‌ڤێ ھنه‌ك كافران نه‌قل دكێ كو: « وَ مَا أَظُنُّ السَّاعَةَ قَائِمَةً وَلَئِن رُّدِدتُّ إِلَى رَبِّي لَأَجِدَنَّ خَيْرًا مِّنْهَا مُنقَلَبًا - (یێ دونیاخاز گووت:) ئه‌ز گومان ناكم قیامه‌ت رابێ و ئه‌گه‌ر (رابێ و) ئه‌ز ب ئالیێ خودایێ خوه‌ ڤه‌ بێم زڤراندن، ئه‌ز باشترێ ژ خوه‌شیێن دونیایی ل وێده‌رێ ب ده‌ستڤه‌ بینم» (كه‌ھف / 36).

و ل سووره‌تێ فوصصله‌ت، ئایه‌تا٥٠ دا‌ ژی دبێژێ: « وَمَا أَظُنُّ السَّاعَةَ قَائِمَةً وَلَئِن رُّجِعْتُ إِلَى رَبِّي إِنَّ لِي عِندَهُ لَلْحُسْنَى - ئه‌ز گومان ناكم قیامت رابێ و ئه‌گه‌ر (رابێ و) ئه‌ز بال خودایێ خوه‌ ڤه‌ بێم زڤراندن، منێ ل بال وی باشترین خوه‌شی و نعمه‌ت ھه‌بن».

ئه‌ڤا كه‌سا ئان گومان كریه‌ د ئاخره‌تێ دا ژی وێ پێ خه‌باتا خوه‌ خوه‌شیێن زه‌حفی بكارن ده‌ستڤه‌ بینن، ئان گومانا وان ئه‌و بوویه‌ كو به‌ھره‌مه‌ندیا وان ژ خوه‌شیێن دونیایێ نیشانا لوتف و مه‌رحه‌مه‌تا خودا یا تایبه‌ته‌ ژ وان را نخوه‌ ئه‌ڤ لوتف و مه‌رحه‌مه‌ت د ئاخره‌تێ دا ژی ژ وان را ھه‌یه‌!