جڤاكا قه‌نج و ئید‌ه‌ئال د‌ پیڤه‌كا نه‌ھجول به‌لاغێ د‌ا

هه‌یهێ! ئاگاهـ بن، صبه‌هی، ئه‌و صبه‌ها ھه‌وه‌ ئاگاھی ژێ نینه‌ و ھوون پێ نزانن، وێ حوکم بکه‌ڤێ ده‌ستێ که‌سه‌کی دا کو نه‌ ژ وان که‌سایه‌ یێن پێش دا حوکم ده‌ستێ وان د‌ا؛ وێ کاربده‌ستێن خوه‌ ژ به‌ر کارێن وا یێن نه‌باش جه‌زا بدێ، وێ عه‌رد زێر و زیڤێن خوه‌ وه‌ک قه‌تێن جگه‌ری ژێرا ده‌رینێ و به‌ره‌كه‌تا خوه‌ ئه‌شكه‌ره‌ بكێ، ڤێجا وێ ئه‌و نیشا هه‌وه‌ بکێ کو عه‌داله‌ت ل وه‌لاتا دا چه‌وانه‌. وێ کتێب و سوننه‌تا مراند‌ین ساخ بکێ.

ھێژانێن ئه‌خلاقی - ناما 31: کورێ من! نه‌فسا خوه‌ بکه‌ میزان و کێشه‌ک د ناڤبه‌ینا خوه‌ و خێنجی خوه‌ دا. ڤێجا ئه‌وێ یا تو ژ خوه‌ را حه‌ژێ دکی ژ خێنجی خوه‌ را ژی حه‌ژێ بکه‌ و ژ وی را نه‌خازه‌ ئه‌وێ یا تو ژ بوونا خوه‌ حه‌ز ژێ ناکی.

زولمێ نه‌که‌ وه‌ک چه‌وا تو حه‌ز ناکی زولم لته‌ بێ کرن ، قه‌نجی یێ بکه‌ وه‌ک چه‌وا تو حه‌ز دکی قه‌نجی دگه‌ل ته‌ بێ کرن. یا تو ژ خه‌لکێ را پیس زانی، ژ خوه‌ را ژی پیس و کرێت بزانه‌؛ یا خه‌لک ده‌رحه‌ق ته‌ دا دکن و تو پێ رازی دبی، تو ژی ئه‌وێ دگه‌ل خه‌لکێ بکی. یا تو نه‌زانی نه‌بێژه‌، هه‌ر چه‌ند یا تو بزانی کێم بێ؛ تشتا تو حه‌ز نه‌کی ژ ته‌را بێ گووتن تو ژی ئه‌وێ نه‌بێژه‌.

ژ فورصه‌تان ئستفاده‌ بکه‌ هێجا ژ ده‌ست نه‌چوویی و نه‌بوویی کول و مه‌ره‌ق.

دووست و هه‌ڤالان ئه‌گه‌ر په‌یوه‌ند و گرێدان بری، تو گرێدانێ چێکه‌ و ئه‌گه‌ر به‌رێ خوه‌ ژ ته‌ زڤراند تو قه‌نجی یێ بکه‌ و نێزیکی یێ چێکه‌ و ئه‌گه‌ر به‌خیله‌تی کر، تو دانێ دگه‌ل بکه‌ و ئه‌گه‌ر خوه‌ دوور کر، تو خوه‌ ب ئالیێ ویڤه‌ بده‌ و ئه‌گه‌ر خوه‌ دژوار کر تو ژێرا نه‌رم ببه‌ و ئه‌گه‌ر خرابیه‌ک ژێ چێبی عوزرێ وی قه‌بوول بکه.. لێ نه‌وه‌بێ تو ڤێ یێکێ گه‌ل که‌سه‌کی بکی کو نه‌ ئه‌هلێ وێ بێ.

ژ برایێ خوه‌ را خێرخاز به‌‌ و که‌ربا خوه‌ داقورتینه..

ئه‌گه‌ر تو بخازی ژ دوستێ خوه‌ جدا ببی هنه‌کی جیێ لهه‌ڤ هاتنێ بهێله‌.. گومانا باش یا د‌ه‌رحه‌ق خوه‌ د‌ا، پێ کارێن قه‌نج و باش بگهینه‌ حه‌قیقه‌تێ.

یا قه‌ومی یی ژ خوه‌ را‌ بکه‌ ده‌لیلا یا نه‌قه‌ومی یی، چکو كارو بار ره‌نگێ ھه‌ڤ د‌د‌ن.

نه‌ ژ وا به‌ كو حه‌تا نه‌یێن ئێشاندن شیره‌ت نابن؛ عاقل ب ئه‌ده‌بێ شیره‌ت دبن، ده‌وار خێنجی ب لێدانێ شیره‌ت نابن.

خه‌صله‌تێن قه‌نج - خوتبا ١٩٢: بلا‌ خوه‌ناڤدانا هه‌وه‌ لسه‌ر خه‌صله‌تێن قه‌نج بێ، وه‌ک: په‌ناھ دانا که‌سێن ھاوارا خوه‌ ژ هه‌وه‌ را تینن و پێک ئانینا سووز و قراران و گوهداری کرنا قه‌نج و باشان و فه‌رمان نه‌برنا ژ موته‌که‌ببران و بژارتنا قه‌نجی یان و دووری یا ژ زولمێ و خوه‌ ڤه‌دانا ژ کوشتنێ و مه‌زن زانینا وێ و ب عه‌داله‌ت بوون دگه‌ل خه‌لکێ و داخارنا غه‌زه‌بێ و خوه‌ دوور کرنا ژ فه‌ساد و خرابی یا د عه‌ردێ دا. بطرسن ژ وی عه‌زابێ کو ژ به‌ر کار و کریارێن پیس و رزیل، سه‌ر ئوممه‌تێن پێشیا هه‌وه‌ دا هاتی، ڤێجا حالێ وان یێ قه‌نج و خراب بدن بیرا خوه‌ و های ژ خوه‌ هه‌بن کو هوون وه‌ک وان نه‌بن.

ده‌ما ھه‌وه‌ وه‌زع و حالێ وان یێ قه‌نج و خراب دا فکرا خوه‌، ب ‌وێ رێکێ ڤه‌ ھه‌رن یا کو پێ وێ مه‌رته‌با وان بلند بی و به‌لا دوژمنێن وان ژ وان ڤه‌بی و سه‌لامه‌تی یێ سھا خوه‌ دانی سه‌ر وان. وه‌ک دوورکه‌تنا ژ بلاڤبوونێ و وه‌ک هه‌ڤگرتن و حه‌ژ هه‌ڤ کرنێ. خوه‌ دوور بگرن ژ وان کارێن پشتا وان شکاندی و خیمێ قودره‌تا وان سست کری، وه‌ک: کینا دلان و گه‌شکرنا ئاگرێ دوژمنی یێ ل سنگا دا و به‌رێ خوه‌ ژ هه‌ڤ زڤراندن و ئاریکاری یا هه‌ڤ نه‌کرنێ.

بنێرن حالێ وان چه‌وا بی ده‌ما کووما وان هه‌ڤ گرتی و بیر و هزرا وان یێک و د‌لێ وان سه‌راست و د‌ه‌ستێ وان ‌گه‌ل ھه‌ڤ و چاڤێ وان تیژ و خوه‌ستێن وان یه‌ک. ما گه‌لو هنگێ نه‌ مه‌زنێن سه‌ر عه‌ردێ بین؟ ڤێجا ل دووماهیکا کارێ وان ژی بنێرن، ده‌ما هه‌ڤگرتنا وان په‌لشی و ب دل و زمان ژ هه‌ڤ جدا بین و کرن خره‌جرو قه‌رقه‌شه‌، خودێ ژی جلکێن که‌ره‌ما خوه‌ ژ وان کرن.