داخازا لێبوورینێ

چقاس من ده‌س ئاڤێت پیساتیيێ ته‌ پێ وێ په‌ردا من نه‌دراند و ئه‌ز بێ په‌رده‌ نه‌کرم و رستکا عه‌يب و عارا وێ نه‌خست ستووێ من و ته‌ قه‌باحه‌تا وێ ئه‌شکه‌ره‌ نه‌کر ژ وی جیرانی را کو ل په‌ي دیتنا کێماسيێن من بی و ژ وان حه‌سوودبه‌ر و چاڤنه‌باران را کو نکارینا نعمه‌تێن ته‌‌ دايین من ببینێ، د په‌ي را ژی دیسا ئه‌ز پاشدا نه‌چووم ژ وێ خرابیيا ته‌ ژ من دیتی.

خودا، ما ڤێجا کی ژ من نه‌زانتره ‌ده‌رحه‌ق وێ يا دورست و خێرا من تێدا؟ کی ژ من بێخه‌متره‌ ده‌رحه‌ق به‌ھر و پشکا خوه‌ دا؟ ئه‌ڤه‌ ئه‌و رزقێ ته‌ دايی من و نه‌ھی کری کو ئه‌ز د رێکا بێ ئه‌مریيا ته‌ دا مه‌صره‌ف بکم ئه‌ز د وێ رێکێ دا ددم، ڤێجا نخوه‌ کیيه‌ قاسی من ژ دورستکرنا نه‌فسا خوه‌ دوور که‌تی؟ ده‌ما گازيا ته‌ و يا شه‌يتان دکه‌ڤێ به‌راھیيا من د وی حالی دا کو ئه‌ز وی باش ناس دکم و قه‌ت من ئه‌و ژ بیر نه‌کريه‌ و ئه‌ز زانم کو ده‌ستھاتا گازیيا ته‌ بھشت و جه‌ننه‌ته‌ و ئاخریکا گازیيا وی ب ئاليێ دوزه‌خ و جه‌ھه‌ننه‌مێ ڤه‌ يه‌ دیسا ژی ئه‌ز دکه‌ڤم په‌ي گازیيا وی، نخوه‌ د ڤی حالی دا کی ژ من پتر نووقی بويه‌ د ناڤ پووچیيێ دا و کی ژ من دژوارتره‌ ده‌رحه‌ق کرنا کارێ خراب دا؟

تو پاک و پاقژی ژ کێماسیيان، چقا عه‌جێبه‌ شه‌ھده‌بینیيا ئه‌ز ل سه‌ر خوه‌ ددم و ئه‌ڤ ئێژمارا ئه‌ز ژ کارێن خوه‌ يێن خه‌ف دبێژم؟ ژ وێ ژی عه‌جێبتر ڤێجا بێھنفره‌ھيا ته‌ يه‌ ده‌رحه‌ق من دا و پاشخستنا جه‌زاکرنا منه‌، ئه‌ڤ ژی نه‌ ژ به‌ر ھێژانا منه‌ ل بال ته‌ به‌لکی ئه‌ڤ پاشخستنا ته‌ قه‌نجی و که‌ره‌ما ته‌ يه‌ د گه‌ل من، دا به‌لکو ئه‌ز پاشدا بچم و ده‌ستا بکێشم ژ بێ ئه‌مریيا ته‌ يا غه‌زه‌ب ئینه‌ر و ئه‌ز ژ خرابیيێن کو مرووڤ درزێنن ڤه‌بم؛ و ژ به‌ر ڤێ يێکێ يه‌ کو عه‌فووکرن و لێبوورینا ژ من ل بال ته‌ شیرینتره‌ ژ وێ يێکێ کو تو من جه‌زا بدی.

يا خودا، ئه‌ڤ ژی ھه‌يه‌ کو ئه‌ز پر گونه‌ھکارم، ده‌وس و شوونه‌وارێن من گه‌له‌ک بێمه‌رێسن، کريارێن من زه‌حف کرێت و پیسن، ئه‌ز بێ ترس ب ئاليێ پووچ و نه‌دورستیيێ دا دچم، ئه‌ز سست و کێم ھشياری مه‌ د ده‌مێ تا‌عه‌تێ ته‌ دا، ده‌رحه‌ق ترساندن و جه‌زادانا ته‌ دا ھاي ژ خوه‌ مان و ھاي ژێ مانا من کێمه‌، کێماسيێن من پرن نايێن ئێژمارێ و ژ من نايێ ئه‌ز به‌حسا ھه‌می گونه‌ھێن خوه‌ ژ ته‌ را بکم.ئه‌ڤا من گووتی و پێ وێ لوومه‌ ل نه‌فسا خوه‌ کری ژبوونا وێ يه‌ کو من دلێ خوه‌ بريه‌ دلووڤانيا ته‌ يا کو کار و بارێ گونه‌ھکاران ب وێ دورست دبێ و ھێڤيا من ئه‌و ره‌حمه‌تا ته‌ يه‌ کو ب وێ گه‌رده‌نا خه‌تاکاران ئازا دبێ.يا خودا، صه‌له‌واتێ ل موحه‌ممه‌د و ئالێ وی ببارینه‌ و پێ لێبوورین و عه‌فوا خوه‌ ڤێ گه‌رده‌نا من يا (کاپکێ) گونه‌ھان ئه‌و زراڤ کری ئازا بکه‌، ھه‌ر وھا صه‌له‌واتێ ل موحه‌ممه‌د و ئالێ وی ببارینه‌ و ب قه‌نجی و باشيا خوه‌ ڤێ پشتا من يا ژ به‌ر بارێ خه‌له‌تی و خرابیيان گرانی ژێرا چێبويی سڤکاھیيێ ژێرا چێکه‌.

ئلاھی، ئه‌گه‌ر ئه‌ز ئه‌وقاس ب ته‌ ڤه‌ بگریم حه‌تا مژوولانکێ چاڤێ من بکه‌ڤن و چه‌رمکێ چاڤان سه‌ر ھه‌ڤ دا بێن و ئه‌ز بکم ھاوار حه‌تا ده‌نگێ من بێ برین و ببرھێ و ئه‌ز ژبوونا عباده‌تێ ته‌ راوه‌ستم حه‌تا پيێن من بوه‌رمن و ئه‌ز خوه‌ ژ ته‌را بچه‌مینم حه‌تا موھرکێن پشتا من ژ ھه‌ڤ ڤه‌بن و جودا ببن و ئه‌ز سه‌رێ خوه‌ ژ ته‌را ده‌ينم سه‌ر عه‌ردێ حه‌تا بیبووکێن چاڤێن من برژن و ئه‌ز د ھه‌می عه‌مرێ خوه‌ دا ئاخا عه‌ردێ بخوم و د درێژيا ته‌مه‌نێ خوه‌ دا ئاڤا شێلوو و ته‌ڤلی ئاخ و خیزێ ڤه‌خوم، دگه‌ل ڤێ يێکێ ژی ئه‌ز زکرێ ته‌ بێژم و به‌حسا ته‌ بکم حه‌تا زمانێ من کوھ ببێ و ژ کار بکه‌ڤێ،ھه‌ر وھا ئه‌ز ژ به‌ر شه‌رما ژ ته‌ چاڤێ خوه‌ نه‌دم عه‌سمانا و بلند نه‌کم، پێ ڤێ يێکێ ئه‌ز ژ ناڤ خرابيێن خوه‌ نابم موسته‌حه‌قێ ژ ناڤبرنا خرابیيه‌کی ته‌نێ ژی.

ئه‌گه‌ر ده‌ما ئه‌ز بووم لايقێ لێبوورینا ته‌ و تو ل من بووريی و عه‌فووکرنا ته‌ ل به‌ر من که‌ت و ته‌ ئه‌ز عه‌فوو کرم، ھه‌ما ھنگێ ژی نه‌وه‌ره‌نگه‌ کو ئه‌و حه‌ق و مافێ من بێ، نه‌وه‌ره‌نگه‌ کو ئه‌ز ئه‌ھل بم ژ جه‌وا‌بدانێ را و حه‌قه‌ک ژ من را چێبیبێ، چکو د ده‌سپێکێ دا ده‌ما من بێ ئه‌مریيا ته‌ کری ھه‌ما ھنگێ حه‌قێ من ئاگر بی، ڤێجا نخوه‌ ئه‌گه‌ر تو من باڤێژی ناڤ عه‌زاب ته‌ زولم و سته‌م ل من نه‌کريه‌.

يا خودێ! ته‌ کو پێ په‌ردا خوه‌ ئه‌ز نخوماندمه‌ و بێ په‌رده‌ نه‌کرمه‌؛ ته‌ کو ب که‌ره‌ما خوه‌ بێھنا خوه‌ فره‌ھ کريه‌ و ل جه‌زادانا من دا نه‌که‌تيی له‌زێ؛ ته‌ ب قه‌نجیيا خوه‌ نه‌رمی نیشان دايه‌ و نعمه‌تێن خوه‌ نه‌گوھازتنه‌ و ژ من نه‌گرتنه‌؛ ته‌ باشیيا خوه‌ ژی دگه‌ل من شێلوو نه‌کريه‌، نخوه‌ ڤێجا مه‌رحه‌مه‌ت بکه‌ و ژ گری و زاریيا من يا درێژ و ژاری و به‌له‌نگازی و ره‌به‌نيا من را دلووڤان به‌.

يا خودا، صه‌له‌واتێ ل موحه‌ممه‌د و ئالێ وی ببارینه‌ و من ژ گونه‌ھان بپارێزه‌، ژ تاعه‌ت و گوھدانێ را بێخه‌ کار، زڤرینه‌ک باش بکه‌ نه‌صیبی من و پێ ته‌وبێ من پاقژ بکه‌، پێ پارازتنێ من ب ھێز بێخه‌، پێ سه‌لامه‌تیيێ من دورست بکه‌، شیریناھیيا لێبوورینێ ب من بده‌ طامکرن، پێ عه‌فوا خوه‌ من ئازا بکه‌ و بێخه‌ به‌ر مه‌رحه‌مه‌تا خوه‌، ئێمناھیيا ژ غه‌زه‌با خوه‌ ژ من را بنڤیسه‌، نه‌ د داھاتێ دا به‌لکی ھه‌ما ڤێگاڤێ مزگینيێ بده‌ من مزگینیيه‌کی کو ئه‌ز پێ بحه‌سم و دگه‌ل وێ ژی نیشانه‌کی بده‌ من کو ئه‌ز ئه‌شکه‌ره‌ و ڕۆناھی بکم.

ھه‌ما براستی ئه‌ڤا ھه‌ د ژێھاتنێ دا ته‌ نائێخێ ته‌نگی و د کارین و قودره‌تێ دا ته‌ نادێ زه‌حمه‌تێ و سه‌ر حلم و بێھنفره‌ھيا ته‌ ناکه‌ڤێ و د دانێن ته‌ يێن زه‌حفی دا گرانيێ ژ ته‌ را چێناکێ ئه‌و دانێن کو ئايه‌ت و نیشانێن ته‌ ئه‌م رێنموون کرین بال وان ڤه‌.

براستی يا تو بخازی تو دکی و يا ته‌ بڤێ تو پێک تینی و ھه‌ما براستی کرنا ھمی کاران ژ ته‌ تێ.