ژ داییك بوونا ئمام مه‌هدی (س) حه‌تا ب شه‌هاده‌تا ئمام عه‌سكه‌ری (س)

موحه‌مه‌‌دێ كورێ ئبراهیم دبێژێ: ئمام عه‌سكه‌ری (س) ژ بونا یێك ژ په‌یره‌وێن خوه‌ په‌زه‌ك سه‌ر ژێ كری رێكر و كه‌ره‌م كر: ئه‌ڤاهه ‌ژ عه‌قیقا كورێ من «موحه‌ممه‌ده»[v]

كه‌رامات

یێك ژ قسمه‌تێن شیرینێ ژیانا ئمام مه‌هدی (س) رسالێن ئه‌ولێ ولاده‌تا وی و پێشیا ڤه‌شارتنێ (غه‌یبه‌تێ) دا ئه‌و كه‌رامه‌تێن كو سه‌رده‌ستێ ئه‌وی حه‌زره‌تی پێك هاتنه، و مه‌عمووله‌ن ئه‌ڤ قسمه‌ت ژ ژیانا وی ھاتیه‌ ژ بیر كرن. ئه‌مێ ل ڤێده‌رێ تنێ نمونه‌یه‌كی بینن:

ئبراهیم بن ئه‌صعه‌دێ نیشابوری دبێژێ: ده‌ما عه‌مرێ كورێ عروف [كو حاكمه‌ك زالم بی و پر حه‌ژ كوشتنا شیعان دكرا] نیه‌ت كر من بكوژێ، ئه‌ز پر طرسیام و سه‌هوێ ئه‌ز گرفتم. ڤێجا من خاترێ خوه‌ ژ دوست و ئه‌حبابا خوه‌ست و به‌رێ خوه ‌د‌ا مالا ئمام حه‌سه‌نێ عه‌سكه‌ری (س) دا ئه‌ز خاترێ خوه‌ ژ وی ژی بخازم و من دخوه‌ستا كو پشتی وێ ئه‌ز بره‌ڤم و خوه‌ خلاس كم. ده‌ما ئه‌ز چووم مالا ئمام، من ل كێله‌كا ئمام حه‌سه‌نێ عه‌سكه‌ری دا كوره‌ك دیت كو رویێ وی وه‌ك مه‌ها شه‌ڤا چارده‌ھێ شه‌وق د‌دا، ب ئاوایه‌ك وه‌ره‌نگ كو ئه‌ز ژ رووناهی یا رویێ وی حه‌یری مام و كێم مابی ئه‌ز ئه‌وێ یا د دلێ خوه‌ د‌ا [طرس و ره‌ڤ] ژ بیر بكم.

[د وی حالی دا ئه‌وی زارووكی] گووت من: «ئبراهیم، نه‌لازمه ‌تو بره‌ڤی، ژ نێزیكدا وێ خودێ به‌لا وی ژ ته‌ بدێ پاش». حه‌یره‌تا من زه‌حفتر بی و من گووت ئمام عه‌سكه‌ری (س): ئه‌ز گوهری! ئه‌ڤ كورك كیه‌ كو ژ دلێ مرووڤ دئاخڤێ؟! ئمام (س) كه‌ره‌م كر: ئه‌و كورێ من و جیگرێ پشتی منه... ئبراهیم دبێژێ: ئه‌ز د حاله‌كی دا ده‌ركه‌تم كو ئه‌ز هێڤیدارێ لوتفا خودێ بیم و من باوه‌ری په‌یدا كربی ب وێ یا من ژ ئمامێ دازدێ سه‌ح كری. پشتی زه‌مانه‌كی مامێ من مزگینی یا كوشتنا عه‌مرێ عروف دا من.[vi]

جه‌وابا پرسیاران

ئاخرین ستێرا پر ب شه‌وقا ئاسمانێ ئمامه‌تێ هه‌ما ل وا سالێن ئه‌ولێ ژیانا خوه‌ دا جه‌وابا قه‌وی و جهێ خوه‌ پێ گرتنێ ددا پرسیارێن په‌یره‌وێن ئه‌هلێ به‌یتێ و دلگه‌رمی و دل رحه‌تی ژ وان را چێدكرا. ژ نمونه ‌ره‌ ئه‌مێ روایه‌ته‌كی ب كورتی نه‌قل بكین:

سه‌عدێ كورێ عه‌بدولاهێ قومی كو ژ مرووڤێن مه‌زن بی د‌ گه‌ل ئه‌صعه‌دێ كورێ ئسحاقێ قومی كو وه‌كیلێ ئمام عه‌سكه‌ری بی ژ پرسیار كرنا چه‌ند پرسیاران و گرتنا جه‌وابا وان را چوو ‌جه‌م ئمامێ یازدێ. ئه‌و جه‌ره‌یانا ئه‌ڤێ دیدارێ وها نه‌قل دكێ: ده‌ما من خوه‌ست ئه‌ز بپرسم، ئمام عه‌سكه‌ری (س) ئشاره‌ كر بال كورێ خوه‌ڤه‌ و گووت: ژ رووناهی یا چاڤێ من بپرسه! د وی حالی دا ئه‌وی زارووكی به‌رێ خوه ‌دا من و كه‌ره‌م كر: چ تشتا تو دخازی بپرسه!... من ئه‌ڤ پرسیار كر ‌كو: مه‌خسه‌‌د ژ «كهیعص» [ژ حه‌رفێن موقه‌طه‌عه] چیه؟ كه‌ره‌م كر: ئه‌ڤ حه‌رف چ ئه‌خبارێن غه‌یبی نه. خودایێ ته‌عالا به‌نده‌یێ خوه‌ زه‌كه‌ریا [پێغه‌مبه‌ر] ژ وێ ئاگاھ ‌كریه ‌و پشتی وێ ئه‌و ژ موحه‌ممه‌د را صه‌لات و سه‌لامێن خودا ل سه‌ر بن گووتیه. مه‌سه‌لا وێ ئه‌ڤه‌ كو زه‌كه‌ریا (س) ژ خودا خوه‌ست كو ناڤێ پێنج كه‌سا [ئالێ عه‌با] ژ وی را بێژێ، خودایێ عه‌زیز و جه‌لیل جبرائیل (س) سه‌ر وی دا رێكر كو ئه‌وا ناڤا ژێ را بێژێ. زه‌كه‌ریا (س) ده‌ما [ناڤێ] موحه‌ممه‌د‌ (ص) و عه‌لی و فاطمه‌ و حه‌سه‌ن دئانیا سر زمان، كول و گیروگرفتا وی ژ ناڤ دچووا و ده‌ما به‌حسا حوسه‌ین (س) دكرا كه‌لاگری گه‌ریا وی دگرتا و شاش دبیا؛ رووژه‌كی گووت: ئه‌ی خودا! چره‌ ده‌ما ئه‌ز ناڤێ وا چارا تینم كول و خه‌ما من دچێ و ئه‌ز رحه‌ت دبم و دلێ من خوه‌ش دبێ، لێ ده‌ما ئه‌ز حوسه‌ین (س) تینم بیرا خوه ‌رووندكێن (هێسترێن) چاڤێ من درژن و نالین ژ من بلند دبێ؟ ڤێجا خودێ ته‌عالا سه‌رهاتا حوسه‌ین (س) ژێ را گووت و كه‌ره‌م كر: كهیعص [ره‌مز و رازا ڤێ مه‌سه‌لێ یه] «كاف» ره‌مزا كه‌ربه‌لایێ و «هاء» ره‌مزا ژ ناڤ چوونا بنه‌مالێ [یا وی] و «یاء» كنایه‌یه‌ ژ ناڤێ یه‌زید كو زولم و جه‌فا ل حوسه‌ین (س) كریه‌ و «عه‌ین» نشاره‌یه ‌بال عه‌طه‌ش و تێهنیتی یا وی ڤه‌‌ و «صاد» نشاره‌یه‌ بال صه‌بر و خوه ‌راگری یا ئمام حوسه‌ین ڤه‌ (س)...